إجمالي مرات مشاهدة الصفحة

02‏/03‏/2011

إعتذار .. تنبيه .. مع الشكر الجزيل لشركة الإنفصالات

بسم الله الرحمن الرحيم


إعتذار :
أحب أعتذر عن الإنقطاع الأخير .. وذلك بسبب إنقطاع خدمة الإنترنت في المنطقة 

 تنبيه :
أحب أوضح شي بسيط قبل توضيح سبب الإنقطاع
وهذا نتيجة لسؤال كثير من الأصحاب والأصدقاء والزملاء عن سبب بعض المواضيع اللي فيها مدح في جهه معينه .. بالرغم من هدف الصفحة اللي هو النقد لغرض الفائدة .. أو بمعنى آخر .. نزف جروح القحمة
وإجابةً على هذا السؤال .. إنه الموضوع اللي أنزله لو ماكان فيه نقد في نفس الموضوع .. فـ النقد راح يكون في التعليقات .. إما بفضح زيف وكذب صحافتنا .. اللي شغاله تطبيل على الفاضي .. وهذا راح يتم عن طريق توضيح الحقائق .. أو توضيح إلى أين وصلت الأمور في بعض المشاريع التي تم البدء فيها منذ زمن .. أو غيرها
فـ لذلك أتمنى من الجميع قراءة التعليقات .. والمشاركة بما ترون فيه صالح القحمة أولاً .. والمدونة أخيراً .. وصالح أياً كان مابين هذا وذاك


شكر :
أتوجه بالشكر الجزيل لشركة الإمتصاصات السعودية لسرعة تعاملها مع الخلل الحاصل في خدمة الدي إس إل في المنطقة "خلال 5 أيام تقريباً" فقط !!




ما راح أتكلم عن خدماتهم السخية للمواطن في ظل أسعارهم المميزه
ولا راح أتكلم عن بعض العملاء اللي استمروا في دفع الفواتير لـ عدة أيام وأسابيع وأحياناً شهور والخدمة لا تعمل لديهم
ولا راح أتكلم عن بعض العملاء اللي كانت تشتغل عندهم الخدمة 12 ساعه وتقفل 12 ساعة "نظام عسكري .. إستلامات يعني"
ولا راح أتكلم عن سرعاتهم العبيطة .. ولما تروح تشيك ع السرعة بطريقتك الخاصة "إما برنامج أو موقع أو حتى صفحة المودم" تلقاها أقل من اللي تدفع حقه .. وأحيان بـ كثير
ولا راح أتكلم عن تعرض الخدمة للعطل عند أقل الأضرار .. مطر لمدة ساعة مثلاً قد يسبب شلل في إتصالات المنطقة
ولا راح أتكلم عن حفريات الإتصالات اللي شوهت الشوارع والطرقات .. دون إصلاحها بشكل سريع وجيد .. مسببين بذللك أضرار لا تسعها عقولهم النيرة
ولا راح أتكلم عن الفنيين اللي يرسلونهم لإصلاح الأعطال .. ولا راح أقول إنهم جايين يتعلمون الشغله في العملاء !!
وما راح أقول إنه مره من المرات جا فني من الشركة مو عارف يقفل المودم 011 تبع الشركة !!
ولا راح أتكلم عن إنه حتى لو أشتكيت على الشركة .. فـ أنت تشتكي الشركة عند الشركة نفسها !!
حتى خط الشكاوي .. حتى هيئة الإتصالات السعودية .. لأنها الدرع الواقي لشركة الإتصالات السعودية التي بدورها تعتبر "الابن المدلل" لهيئة الإتصالات
ولا راح أتكلم عن خدمة العملاء .. اللي الظاهر والله أعلم إن الموظفين فيها فاهمين السالفة غلط
وبالمناسبة أقترح عليهم تغيير الاسم لـ .. مذلة العملاء .. أو خدمة الشحاذين
وألا أقول .. خلوني أتكلم شوي في هالنقطة
طبعاً أول ما تتصل على خدمة العملاء .. سواءً 907 أو 906 .. فـ هم يستقبلونك إستقبال حافل "أنتظر 10 دقايق لو سمحت"
أول ما يرد عليك "كثير من الموظفين" يعطيك اسمه "ماتدري وش يقول بالضبط" لأنه قاعد ياكل الكلام أكل لأنه محسوب عليه دقايق معينه مع العميل
طبعاً في البداية يرد عليك بأسلوب حلو ويفتح النفس .. فلان الفلاني معك كيف أقدر أخدمك .. يعني تحس إن متصل على شخص متحمس يخدمك ويعطيك حقك وينصفك .. بس  للأسف "كثير منهم" ما يسلم .. يعني تقول كأنه ناوي شر والعياذ بالله
وهذا آخر شي حلو تسمعه منه .. لأنه بعد كذا .. مهما كانت شكواك .. فـ ردودهم المكررة ومعرفتهم السطحية بالخدمة اللي قاعدين يقدمونها يخلونك ودك تقفل السماعة .. لولا إنه "عيب" عليك يالعميل تصك السماعة في وجه كائن من كان فما بالك بمن يقدم لك خدمة
طبعاً بما إن كلامنا عن الدي إس إل .. فـ خذ مجموعة ردود راح يسمعك إياها أي موظف بخدمة العملاء .. طبعاً بعد ما يتأكد من الرقم واسم صاحب الرقم .. وبس أبي أقول لك شغله .. إنه مهما شرحت راح يعطيك نفس الأسئلة .. مهما اختلفت المشكلة بينك وبين مليون غيرك .. نفس الاسئلة
راح يقول لك المودم شغال ؟ لمبة الدي إس إل شغالة ؟ لمبة الإنترنت شغالة ؟ السلك مشبوك ؟ ومن هالاسئلة اللي صرنا حافظينها وعارفينها واللي مالها فايدة لأني لما أشتكي يكون في خلال شكواي توضيح حقيقي للمشكلة بس مين اللي يسمع ؟ ممكن حتى يرمي التلفون لين تخلص الشكوى ويرجع مباشرة يسألك هالأسئلة الغبية .. هذا إذا ما قاطعك وانت تشرح له المشكلة وتوضح له بالتفصيل عشان يكون على بينه ويقوم يسألك .. المودم شغال ؟ إلخ
أحيان كثير أصير أنا والموظف تحدي مين اللي صوته أعلى من الثاني .. أسمع له كلامه للنهايه ولما أجي أتكلم يقاطعني .. وان سكت وخلص ورجعت أتكلم قاطعني .. فـ مافيه فايدة غير كل واحد يرفع الصوت واللي صوته أعلى هو الفايز !!!!
وإذا فيه موظف من شركة الإتصالات يقرا الكلام ومو مصدق ياريت يتواصل معي مباشرة ويكون له القدرة على الدخول للمكالمات المسجلة عشان يتأكد من الموضوع .. وهذا عميل واحد فقط من مجموعة عملاء تعيسين مع الشركة الكئيبة
المهم .. نجي نشوف الإقتراحات السقيمة بعد شرح المشكلة والأسئلة الغبية
راح يقول لك قفل المودم وشغله .. تروح وتقفله وتشغله ونفس المشكلة .. بيقول لك قفله 10 دقايق وارجع شغله
وراح يقول لك في النهاية المشكلة من التسليك الداخلي << يعني يرمي المشكلة عليك !!
طبعاً ما نقول غير الله يعين على "كثير من الموظفين" في خدمة العملاء
لأن أحياناً بعضهم يبدا يألف لك ويدخل جو ويحسب إنه مخترع الدي إس إل أو صاحب براءة إختراع في حلول الخدمة !!
المشكلة الأخيرة اللي حصلت في القحمة .. كانت بداياتها يوم الثلاثاء الموافق 19 / 3 / 1432 هـ
هذا اليوم صاحبه توقف في الخدمة لأوقات .. وعملها في أوقات أخرى
أما بالنسبة ليوم الأربعاء .. وما تلاهـ .. إلى يوم السبت .. فـ الخدمة متعطلة بالكامل .. حتى يوم الأحد الموافق 24 / 3 / 1432 هـ .. تقريباً الساعة 6 م .. تم إعادة تشغيل الخدمة
يوم الثلاثاء ما قدمت شكوى .. قلت المشكلة عندي بس .. لكن لاحظت يوم الأربعاء المشكلة عندي وبمكان العمل وكل ما سألت أي شخص يقول عنده نفس المشكلة .. وهي إن المودم شغال وكل شي تمام .. بس مافيه تصفح
يوم الأربعاء بالليل قدمت بلاغ للشركة عن طريق 906 .. ووضحت له المشكلة بالتفصيل .. وللأسف الأسئله الغبيه نفسها .. والحلول السقيمة نفسها >_<
في النهاية يقول المشكلة من اليوزر ؟ قلت له المشكلة يالغالي عامه مو خاصه عشان تقول لي يوزر .. قال لا خاصة .. قلت كيف خاصة والمنطقة كلها تعاني من نفس المشكلة ؟ هل معقولة كلها مشكلة يوزرات ؟ قال لا خاصة وانت الوحيد بس اللي عنده المشكلة !!
قلت لا مو الوحيد .. بعدين كيف تعرفون إنها خاصة أو عامه ؟ هل هو بعدد البلاغات مثلاً ؟ قال لأ .. عن طريق تحديثات للسيرفرات وكلام فاضي ما بلعته لأني عارف إمكانيات الإتصالات على الأقل عندنا .. لأن ماعمرهم جوا وصلحوا مشكلة من نفسهم .. لازم حنا نتصل فيهم
عموماً أنا ما صدقته .. المهم اليوم الثاني اتصلت اتأكد من وضع البلاغ .. قال المشكلة ما زالت موجودة .. ونفس الكلام حول المشكلة هل هي خاصه أو عامه اللي دار بيني وبين الموظف الأول دار بيني وبين هذا ونفس الوضع  تقريباً
عموماً ماصدقت هالثاني بعد .. وقمت مسكت الجوال وارسلت رسايل sms لعدد من الأصحاب أطلب فيه منهم يتصلون يبلغون عن المشكلة عشان تكون المشكلة عامة مو خاصة لأني عارف إنهم ما راح يقرون بعمومية المشكلة إلا بعدد البلاغات .. وهذا اللي فعلاً صار
واحد من الشباب يكلمني يقول قابل الفني وقال له البلاغات وصلت تقريباً 35 ووقتها عتمدوا ان المشكلة عامة
حطوا لنا الرد الآلي يقول الخلل في المقسم وعلى هالحال خميس وجمعه .. السبت شالوا الرسالة والخدمة مازالت متعطلة
كلمت خدمة العملاء رد علي موظف محترم جداً وفعلاً فاهم .. وقام بعمل خطوات وإجراءات ولا عمر واحد من الموظفين عملها معي من قبل في أي بلاغ سابق
وضح لي وقتها إن المشكلة من الكبينة وهذا اللي فعلاً صار وتم إصلاح العطل في اليوم التالي .. الأحد .. تقريباً الساعة 6 مساءً
يعني تقريباً الخدمة تعطلت 5 أيام .. لذلك شكراً شركة "الإنفصالات" لكثرة فصل الخدمة .. أو "الإمتصاصات" لإمتصاصاها جيوب المواطنين بغير حق .. فـ الفواتير نوعاً ما عالية .. والخدمة تنقطع بشكلل متكرر ومشاكلها كثير .. لذلك فـ الفواتير حتى وإن كانت غير مرتفعة .. إلا أنها تؤخذ على خدمة من المفترض أنها تعمل بشكل مستمر .. في حين أنها لا تعمل كذلك !!
شكراً لأنكم عرفتونا على إنه مهما كان العميل على حق فـ هو مخطئ .. على قيمة الإنترنت الحقيقية .. على إنه أول ماتنزل شركة ثانية تقدم خدمة الدي إس إل .. ننتقل إليها مباشرة غير مأسوف عليكم

أشياء كثير "سلبية" تحدث من قبل هالشركة "المتفرعنه" على العميل .. لأنه وببساطة .. لا يوجد بديل

ليست هناك تعليقات:

إرسال تعليق